Ek Din Achanak Part 28
Jay use dekhkar chaunk gaya aur bola “Nahin ye wo ladka nahin ho sakta. Tum pehchanne mein koi galti to nahin kar rahe ho”
Ravi ne uski baat sunkar kaha “Mujhe to Pawan ne bataya hai. Maine to us ladke ko dekha bhi nahin hai. Kyun Pawan tu sure hai na ki ye wohi ladka hai”
Pawan ne Ravi ki taraf dekha aur kaha “Haan yaar ye wohi ladka hai. Maine apni aankhon se use dekha hai. Usse baatein ki hain. Meri aankhen dhokha kaise kha sakti hain. Lekin Jay tum ise kaise jaante ho aur ise dekhkar chaunke kyun”
“Yaar ye Sanju hai, Mukesh ka bhai. Wohi Mukesh jisne hamari ragging li thi first day”
Ab chaunkne ki baari Ravi aur Pawan ki thi. Unhen samajh mein aa gaya tha ki Jay chaunka kyun. Koi bhi chaunk jaata ye soch kar jahan Mukesh itna khudgarz, juniors ko kuch na samajhne wala, hamesha rob jamane wala ladka hai wahin uska bhai itne achhe nature ka bhi ho sakta hai. Lekin ye sach tha aur is sach ko ye teeno jhutla nahin sakte the.
Pawan ne phir poocha “Mana ye Sanju hai lekin tumhe kaise pata iske baare mein ki ye Mukesh ka bhai hai. Tumhe bhi to dhokha ho sakta hai na”
“Kamal karte ho yaar. Do din college se gol tum dono rahe the main nahin. Uska bhai khud class mein aaya tha ise lekar aur badi hi akad ke saath dhamki dekar gaya tha ki Sanju uska chota bhai hai aur agar kisi ne use pareshan kiya to usse achha koi nahin hoga.
Teeno soch mein pad gaye ki bhagwaan bhi kya khel khelta hai. Jahan ek bhai kisi raavan se kam nahin hai to doosra ram ki bhumika nibha raha hai. Kya kahin aisa bhi ho sakta hai. Do alag alag nature ke person ek saath ek hi chat ke neeche rehte ho aur unme koi takraav, koi uljhan, koi pareshani paida na ho.
Itne mein Sanju us ladki se free hua to usne Ravi aur Pawan ko dekh liya aur unse milne pahunch gaya. “Aur dost kaisi hai ab tabiyat. Sorry mujhe us din achanak jaana pada. Bahut jaroori kaam aa gaya tha. Main mil bhi nahin paya tumse Ravi”
“Koi baat nahin dost. Waise aapka naam kya hai” Ravi ne ek baar confirm karne ki soch li. Shayad koi aur hi nikal jaaye.
“Oh Sorry. Maine apne baare mein to bataya hi nahin. Waise bhi us din bata raha tha to Pawan sune bagair wahan se tumhare paas chala gaya tha kyunki tumhe hosh aa gaya tha. Mujhe bhi ghar se phone aa gaya tha ek jaroori kaam ke liye isliye mujhe bhi jaana pada. Waise mera naam Sanju hai.”
“Kya Mukesh tumhara bhai hai.”
“Haan wo mere bade bhai hain. Kyun aisa kyun poocha tumne”
“Nahin kuch nahin. Bas aise hi”
“Samajh gaya unhone shayad tum logon ki ragging kari hogi. Unhe is kaam mein bada maja aata hai. Lekin tum unki kisi baat ka bura mat manna. Dil ke bahut achhe hain wo”
Itne mein Jay bol pada “Lekin parson to wo class mein dhamki de rahe the uska kya”
“Are yaar uske baare mein tension mat lo. Mujhe bahut pyaar karte hain aur mere baare mein kuch jyada hi possessive hain isliye. Aisa kuch nahin hai. Hum sab dost hai yahan. Bas wo aise hi hai lekin jaisa maine aapko bataya dil ke bahut achhe hain to koi musibat mein ho to sabse pehle help ke liye wo hi hamesha aage rahte hain”
Idhar Pawan soch raha tha ki kya khaak achha hai. Us din to bechare Jay ko dauda dauda kar maar hi dala tha. Bhaga to aise raha tha jaise Olympic ki race mein dauda raha ho.
Ravi ne Pawan ko kuch sochte huye dekha aur poocha “Kya sochne laga Pawan”
“Kuch nahin aise hi. “Jay tum to keh rahe the ki dil ke achhe hain lekin ragging wale din to apne Jay ki haalat bahut buri kar di thi unhone” Aur itna kehkar Pawan ne Sanju ko sab baatein bata di ki kaise unki ragging huyi aur ragging ke baad bhi canteen ka kharcha in logon ko hi karna pada.
“Yaar ab wo senior hain. Aise hi unki ragging bhi huyi thi kabhi aur tum log bhi ragging karoge ek din aise hi naye students ki. Ismein itna bura manne wali kya baat hai”
Pawan ne kuch aur poochna theek nahin samjha. Ravi ne maamla gambhir hota dekhkar Sanju se poocha “yaar ek baat batao ye ladki kaun hai. Pawan to bata raha tha ki us din tumhare saath koi aur ladki thi aur aaj koi aur”
“Kuch nahin ek dost hai. Ladkiyon ke maamle mein main thoda lucky hoon. Aur ye kehte huye uske chehre par ek muskaan khil gayi jise dekhkar sab khilkhilakar hans diye.”
“Waise isse milne ki kahani bhi badi dilchasp hai. Kal hi isse mulakat huyi thi meri aur aaj hum achhe dost hain”
“Itni jaldi dost bhi bana liya. Mujhe to Riya se dosti karne mein bahut time lag gaya tha. Pata nahin kitne papad belne pad gaye the usse dosti karne ke liye”
“Ye Riya kaun hai bhai. Kabhi milwao yaar hamein bhi. Hum bhi to dekhen us ladki ko jisne Pawan ka dil churaya hai. Wo khusnaseeb kaun hai”
“Apni class mein hi hai. Kabhi bhi mila denge. Lekin aap is ladki ke saath ki kahani bata rahe the wo kya hai. Kab mili, kahan mili, kaise dosti huyi.”
“Are yaar itne saare sawal ek saath. Thoda sa saans lene do batata hoon.”
Aur iske baad Sanju unhen us ladki se huyi mulakat ke baare mein batane lag gaya.
“Main kal cyber café mein gaya tha. Jaise ki mujhe naye naye dost banana pasand hai to aksar yahoo par chatting kiya karta hoon. Kal bhi aise hi ek chat room mein ghus gaya. Wahan Simi naam ki ladki ki ID se ek id mili. Pehle to maine socha ki shayad koi ladka hai jo ladki ki ID banakar baat kar raha hai lekin fir socha try karne mein kya harz hai”
Bas fir kya tha maine usse baat karni shuru kar di.
Sanju: Hi, How r u?
Thodi der tak reply nahin aaya to main kisi aur ko dhoondhne laga ki tabhi uska reply aa gaya.
Simi: Me Fine, u’r asl
Sanju: M, 21, India and urs
Simi: F, 19, India
Sanju: What’s u’r hobbies
Simi: Listening Soft Music, Singing, Making new friends. And urs
Sanju: Meri aur tumhari hobbies bilkul milti julti hain. Mujhe bhi soft music bahut pasand hai specially old songs. Naye dost banata rehta hoon. Haan gaane ke maamle mein main sirf bathroom singer hoon.
Aise hi halki fulki baatein dono mein chalti rahi (Main jyada detail mein nahin likh raha kyunki sab dost samajhdar hain aur unhen iska shayad mujhse jyada experience hai). Tabhi Sanju wahan se uthkar halka hone ke liye gaya to uski najar wapas aate samay uske aage baithi ladki ke window screen par padi. Sanju ye dekhkar chaunk gaya ki jis ladki se wo itni der se baat kar raha hai ye wohi ladki hai kyunki saamne uski screen par Yahoo messenger khula tha aur Sanju se baatein jisme ho rahi thi wo chat window bhi.
Sanju ne ek najar us ladki ko dekha aur uska saara bhoogol apne dimaag mein baitha liya aura a gaya apni seat par.
Sanju: Simi ek baat batao tum kahan se chat kar rahi ho. Apne ghar se ya kisi cyber café se.
Simi ne jhoot bolne ki garj se kaha apne ghar se. Sanju uski baat sunkar muskura diya.
Sanju: Achha chalo main kuch baatein poochta hoon uska jawab dena aur pls sach sach batana.
Simi ne socha shayad ladki patane ke koi naye bahane batayega aur ul-jalul sawal poochega. Use bhi time paas karna tha to usne haan kar di.
Sanju: Sabse pehli baat tum ghar se nahin kisi cyber café se chat kar rahi ho.
Simi: Haan main ek cyber café se hi chat kar rahi hoon. Good guess aage.
Sanju: Tumhari average height, eyes colour brown ki hai, baal kandhe tak hain aur body slim hai.
Simi chaunk gayi aur turant usne Sanju se poocha kya usne use pehle kahin dekha hai.
Sanju: Nahin hum pehle kabhi nahin mile. Sirf guess kiya tha. Kyun sahi kiya tha na. Aur ye likhte huye Sanju pet pakadkar hans raha tha lekin wo awaaz itni dheemi thi ki sirf usi tak hi seemit thi. Simi uske aage baithi thi jiski wajah se wo Sanju ke reactions nahin dekh pa rahi thi.
Simi: Mujhe lag raha hai kit um jhoot bol rahe ho. Koi kisi ke baare mein itna sateek guess kaise laga sakta hai. Khair jaane do aur kya kya guess laga sakte ho tum.
Sanju: Tumne black jeans aur ek yellow top pehna huya hai.
Simi ko ye sunkar jhatka sa laga aur apne charon taraf dekhne lagi. Sanju ki taraf bhi usne dekha lekin usne aisa koi react nahin kiya jiski wajah se us par shak ho.
Simi: Mujhe dar lag raha hai. Tum kaun ho aur mujhe kaise jaante ho. Kya hum kabhi mile hain kabhi. Kya tum mere college mein padhte ho ya mere ghar ke paas rehte ho. Pls mujhe batao jaldi se.
Sanju: Nahin bas guess kiya kyunki jyadatar ladkiyan yahi pehnana pasand karti hain. Kya tumne bhi yahi pehna huya hai.
Simi: Nahin maine ye nahin pehna huya hai. Achha ek baat batao ki main akeli aayi hoon ya apni kisi dost ke saath.
Sanju ne jhaank kar dekha to wo door doosre computer par baithi kisi ladki ko ishare se apne paas bula rahi thi.
Sanju: Tum apni dost ke saath aayi ho lekin abhi akeli ho.
Simi ne turant us ladki ko sab dikhaya aur us ladki ne poore café ka chakkar laga diya. Sanju ko pehle se pata tha ki aisa hoga to usne window minimize kar di thi.
Us ladki ko bhi kuch samajh nahin aaya aur usne ye baat Simi ko bata di aur apni seat par jaakar bata di.
Sanju: Kya hua kahan chali gayi.
Simi: I am dying to meet you. Batao kahan miloge.
Sanju: Lekin mujhse milne se pehle tumhe ek kaam karna hoga.
Simi ye sunkar thoda ghabra gayi lekin fir bhi usne himmat karke pooch hi liya ki kya kaam
Sanju: Are ghabra kyun rahi ho. Jyada kuch nahin just turn your chair.
Jaise hi Simi ne apni chair ghumayi to Sanju ne use muskurate huye haath hilaya.
Simi turant uske paas uthkar aayi aur boli ki to tum ye sab baat kar rahe the. Tum jaroor meri ID dekhkar baithe hoge.
“Nahin maine to tumhari ID pehle dekhi hi nahin thi. Mujhe to pata hi nahin tha ki jisse main baat kar raha hoon wo isi cyber café mein maujood hai. Wo to beech mein washroom gaya tha tab meri najar tumhari window screen par padi aur apna naam dekhkar samajh gaya ki jisse main baat kar raha hoon wo tum ho.”
Simi aaj ke modern jamane ki ek bold ladki thi. Usne bilkul bhi bura nahin mana. Infact use Sanju bahut achha ladka laga. Jisne sab saaf saaf bata diya. Dono iske baad café se nikal kar ek restaurant gaye aur ek doosre ke baare mein ghanto baat karte rahe. Is tarah dono mein dosti ho gayi.
To be continued.
Kareem
13-Jan-2022 08:31 PM
Nice
Reply
Seema Priyadarshini sahay
21-Nov-2021 11:44 PM
👌👌
Reply
Swati chourasia
12-Oct-2021 07:35 PM
Very beautiful 👌
Reply